Президенттин Ош облусундагы ыйгарым укуктуу өкүлү Эльчибек Джантаев бүгүн, 21-июль күнү, облустук укук коргоо органдарынын жана мекеме-ишканалардын жетекчилери менен биргеликте Ноокат райондук мамлекеттик администрациясынын жыйындар залында кеңейтилген аппараттык жыйын өткөрдү.
Жыйынга райондук мекеме-ишканалардын жетекчилери, айыл өкмөт башчылары жана Кыргыз Республикасынын Коомчулукту өнүктүрүү жана инвестициялоо агентствосунун (АРИС) өкүлдөрү катышты.
Күн тартибинде төмөнкү маселелер каралды:
1. “Кыргыз-Ата” мамлекеттик жаратылыш паркы, атап айтканда “Кара-Кой” жана “Абшыр-Ата” туристтик зоналарынын инфратүзүмдөрүн жакшыртуу маселеси;
2. Ноокат районунун инфратүзүмүн жакшыртуу боюнча жүргүзүлүп жаткан иштер, тактап айтканда:
• канализация маселеси;
• Ноокат шаарынын айланма жолундагы өтмөктүн курулушу;
• 6 кабаттуу турак үйдүн курулушунун абалы;
• Ноокат шаарын айланып өтүүчү альтернативдик жолдун курулушу;
• салынып жаткан жолдордун жана курулуштардын жалпы абалы.
Иш-чаранын жүрүшүндө Ош облусунун башчысы Эльчибек Джантаев Ноокат районунда ар бир тармак боюнча токтолуп, аткарылган иштерди жана орун алган кемчиликтерди баса белгилеп өттү. Ал тиешелүү жетекчилерден маселенин себебин сурап, көйгөйлөрдү тез арада жоюу боюнча бир катар жетекчилерге кыска мөөнөттүк тапшырмалар менен эскертүүлөрдү берди.
Андан соң күн тартибиндеги маселелерди талкуулоо маалында “Кара-Кой” жана “Абшыр-Ата” туристтик аймактарындагы инфратүзүмдөрдү жакшыртуу боюнча сунуш-пикирлер айтылып, конкреттүү тапшырмалар берилди. Ошондой эле Ноокат районундагы башка инфратүзүмдүк долбоорлор боюнча аткарылып жаткан иштердин жүрүшү талкууланып, жооптуу жетекчилерге так милдеттер жүктөлдү.
Жыйын соңунда ыйгарым укуктуу өкүл бардык жетекчилерди көтөрүлгөн маселелерге жоопкерчилик менен мамиле жасап, натыйжалуу иш алып барууга чакырды
