Аманкан Кенжебаевдин жетекчилиги астында аппараттык жыйын өттү

12.08.2026  18:30

675

Аманкан Кенжебаевдин жетекчилиги астында аппараттык жыйын өттү

Бүгүн, 12-август күнү Кыргыз Республикасынын Президентинин Ош облусундагы ыйгарым укуктуу өкүлү Аманкан Кенжебаевдин төрагалыгы алдында кезексиз аппараттык жыйын болуп өттү.

Жыйындын күн тартибинде 6 маселе каралды. Анда облустун социалдык-экономикалык өнүгүүсүнө, алдыдагы күзгү-кышкы мезгилге даярдык көрүүгө, ошондой эле бир катар маанилүү долбоорлордун ишке ашырылышына байланыштуу маселелер талкууланды.

Күн тартибиндеги негизги маселелер:

VI Дүйнөлүк көчмөндөр оюндарына даярдык: VI Дүйнөлүк көчмөндөр оюндарына катышууга даярдыктардын жүрүшү жөнүндө маалымат берилди.

«100 өнөр жай ишканасы – 2026» долбоорунун алкагында даярдыктар: 31-августка белгиленген ачылышка даярдалып жаткан 9 ишкананын жана социалдык объектилердин абалы жөнүндө маалымат берилди.

Ыйгарым укуктуу өкүл Аманкан Кенжебаев 31-августка чейин ачыла турган ишканалардын документ иштери толук бүткөрүлүп, ачылууга тоскоолдук жаратпоосун камсыз кылуу боюнча конкреттүү тапшырмаларды берди.

Жер мунапысы: Кыргыз Республикасында жүргүзүлүп жаткан жер мунапысы боюнча иштердин жүрүшү жөнүндө маалымат берилди.

Күз-кыш мезгилине даярдык: Экономика тармактарын жана калкты 2026-2027-жылдардын күз-кыш мезгилине даярдыктарды көрүү боюнча маселе каралды.

Жарандардын кайрылуулары: Кыргыз Республикасынын Президентинин Ош облусундагы иш сапары учурунда жана ыйгарым укуктуу өкүлдүн жарандар менен жолугушууларында түшкөн жазуу жүзүндөгү кайрылуулар боюнча маалымат берилди.

Аткарылган иш-чаралар: Кыргыз Республикасынын Президентинин жана ыйгарым укуктуу өкүлдүн буга чейинки иш-чаралар пландарынын аткарылышы жөнүндө отчет берилди.

Жыйынга облустук мамлекеттик органдардын жетекчилери, райондук мамлекеттик администрация башчылары – акимдер, алардын орун басарлары катышышты.

Жыйындын жыйынтыгында тийиштүү тапшырмалар берилип, аткарылышы көзөмөлгө алынды.

🏛️ Маалымат: КР Президентинин Ош облусундагы ыйгарым укуктуу өкүлүнүн басма сөз кызматы